رفعت كفي .. ماقدرت ارفع الصوت

رفعت كفي .. ماقدرت ارفع الصوت
لو كان فالخاطـر .. كلام ٍ كتمته

لحظه وداع / وكنها سكرة الموت
ضاع الطريق .. اللي من اول رسمته

ضاع الطريق وصرت في الدرب مبهوت
مدري وش اللي فاتني ما اغتنمته !
العمر مرّ .. وراح مع فايت الفوت
صحيح ضعت .. وضاع حلم ٍ حلمته

الا انت ياللي قربك لروحي القوت
لو غبت / يبقى وسمك اللي وسمتـه


يبقى كما نقش ٍ على الصخر منحوت
حفظته .. بشكله ولونه وسمتّه


مهما الفراق اوجاع والبعد ممقوت
اصبح مصير ٍ من غلاك / احترمته

سكّت .. وانا من موادعك مكبوت
شي ٍ تجاهلته .. وشي ٍ فهمته !


حبل الرجاء من جور الايام مفلوت
ياليت قلبي عن غرامك عصمته

ياما .. بنيت بيوت وبيوت وبيوت
اليوم .. كم بيت ٍ بنيته .. هدمته


ما جاك شايل معه احاسيس وشعور
الا يبي ينهي بـ.. صدرك مطافه



جاء يسكنك من كثر ما لحقه قصور
ما يرجي اكثر من حقوق الضيافه

عزيمته ماتت .. وخاطره مكسور
آخذه .. اذا ماكان فيها كلافه



احتاج لك في ضيقتي لاتضايقت
واشتاق لك والشوق غلاب دايم


تبي الصحيح ؟؟؟
اشتقت واشتقت واشتقت
اقطع من الضيقه فجوج الخرايم

محتاج افضفض لك .. بعد ماتطرّقت
لـطعوني اللي عند غيري غنايم


اضحك وانا لاراق جوي ولا رقت
واسهر وكلٍ في حلا النوم نايم


من صكة اقدار الزمن مابعد فقت
في داخلي من جور وقتي هزايم




قل ماتبي .. ( ومسامحك )
فضفض / ترى ماباقي وقت ..!


خذ ماتبي .. ( ومسامحك )
اسامحك ؟؟ لااااا ماصدقت ..!

ماظني اقدر لو قدرت ..
واذا قدرت اسامحك .. ايه انكسرت ..


الله يسامح دمعتك .. هذا كلام ؟ ..
اصارحك ؟ ( ماجاء على بالي رجوووووع
الى هنا
واستسمحك
اباخذ اوجاعي
واروووح ..!
لاول مشاوير العتب
وآخر مسافات الجرووح
ماعاد لـحضوري مكان
ولا لك بقلبي مكان
( حنا انتهينا من زمان )





كم واحد ٍ لو حضر ماهوب موجود
ندرك وجوده .. ليا اوحينا كلامه



وانا احسب ان الغياب سهود ومهود
لو كنت .. اميّز حلاله من حرامه

ويوم افترقنا الضحى يا أعز مفقود
حسيت بالكون .. يوم اسدل ظلامه

برّي .. وبحري .. ونسمة بارد النود
وسماي فاقدك .. غمامه / غمامه

سحاب ..لكن بدون بروق ورعود
عجزت اواسيه حتى بـ..أبتسامه
والونّه .. اللي تغيب شهور وتعود
صرت اتمنى لها .. طيب الاقامه ..!
لولا الغلا .. يابو ( هلا وآمر وسمّ )
ماكان والله من كلامك .. تضايقت !


لكّن .. كل اللي تبيه ( ابشر وتم )
لو انني من صدمتي .. مابعد فقت

في ماحصل فكرت بـ.. الكيف والكمّ
فيك انت ّ .. والا فيّ / يومي تعلقت !

كتبت لك .. ( ودّي وتقديري الجمّ )
وقلبي كتب لك من وراء ضلوعه ( اشتقت )


ولو قلت كم جرح ٍ مع الوقت يلتمّ
جرح الشعور / يزيد شرّه مع الوقت